Utafiti: Marekani huchangia misaada ya Sh7.3 trilioni Tanzania kila mwaka

Dar es Salaam. Wakati uhusiano kati ya Tanzania na Marekani ukifikisha miaka 63, imebainika Tanzania imekuwa ikipokea misaada inayofikia Sh7.32 trilioni kila mwaka kwa miaka 10 mfululizo tangu mwaka 2012.

Ripoti ya utafiti uliofanywa na Taasisi ya William and Mary’s Global Research institute na Taasisi ya Utafiti wa Kundoa Umasikini (Repoa) imetaja sekta zilizoguswa na msaada huo ni afya, elimu, kilimo, biashara na utalii.

Hayo yameelezwa leo Jumanne Juni 18, 2024 jijini Dar es Salaam katika uzinduzi wa ripoti ya Kuwekeza kwa Watu Tanzania, iliyokusanya takwimu za miaka 10 iliyopita kuanzia mwaka 2012 hadi 2023.

Akitoa matokeo ya utafiti huo, mtaalamu mwandamizi wa sera wa taasisi ya AidData, Divya Mathew amesema umejikita katika ushirikiano wa kifedha kati ya Tanzania na Marekani.

“Tumechukua takwimu za misaada na biashara iliyofanyika ikihusisha Serikali na sekta binafsi ikiwa pamoja na mtu mmoja mmoja zikiwamo fedha zilizotolewa na Watanzania waishio Marekani.

“Tumeona kuna wastani wa Dola2.8 bilioni (Sh7.32 trilioni) zinazoingia kwenye uchumi wa Tanzania kwa miaka kwa miaka 10 mfululizo,” amesema Mathew.

Akizungumzia utafiti huo, Mkurugenzi Mtendaji wa Repoa, Dk Donald Mmari amesema utafiti huo umeonyesha kuwepo kwa mafanikio kwa pande zote mbili.

“Kwa mfano katika sekta ya afya kumekuwa na msaada ya takribani Dola 394 milioni (Sh1 trilioni) hususani katika magonjwa ya Ukimwi na malaria na kumekuwa na mafanikio ya kupunguza vifo vitokanavyo na magonjwa hayo,” amesema Dk Mmari.

Ametaja pia maeneo ya usalama wa chakula na sekta binafsi akisema yameguswa.

“Kuna eneo la miundombinu, Shirika la Millenium Challenge liliwekeza takribani Dola 700 milioni (Sh1.83 trilioni) katika barabara na umeme.

“Kuna maeneo ya ulinzi na usalama, kuna biashara na uwekezaji katika madini na utalii. Kuna kampuni za Tanzania zimeuza bidhaa zake katika soko la Marekani, fursa iliyotokana na Sheria ya Agoa inayotoa fursa kwa wazalishaji wa Afrika kuuza bidhaa bila kutozwa ushuru,” amesema Dk Mmari.

Ametaja pia ubadilishanaji wa wataalamu, akisema kuna walimu wa Marekani wanaokuja kufundisha Tanzania na kufanya utafiti na pia wapo wanafunzi wanaokwenda kusoma Marekani kwa ufadhili.

Mkurugenzi wa uchambuzi wa sera wa AidData, Samantha Custer amesema licha ya uhusiano wa muda mrefu wa nchi hizo mbili, viongozi na wananchi wengi wa Tanzania hawana taarifa za kutosha, hasa wakati huu ambao Tanzania inatathmini mafanikio ya Dira ya Taifa ya Maendeleo ya mwaka 2025.

“Ni matumaini yetu, ripoti hii itasaidia kuwaelewesha watunga sera kuona kama ushirikiano wa Marekani na Tanzania unachangia ukuaji wa uchumi wa Tanzania,” amesema Dk Mmari.

Akizungumzia mchango wa Marekani katika sekta ya kilimo na usalama wa chakula nchini, Profesa David Nyange amesema miongoni mwa miradi iliyoonyesha ushirikiano kati ya nchi hizo mbili ilikuwa ni ujenzi wa Chuo cha Kilimo cha Morogoro kilichobadilishwa kuwa Chuo Kikuu cha Kilimo cha Sokoine (SUA).

“Chuo hiki kimechangia katika kuzalisha rasilimali katika sekta mama ya kilimo kinachozalisha chakula,” amesema Profesa Nyange.

Ametaja miradi mingine ni ushirikiano katika utafiti wa kilimo uliohusisha vyuo vikuu mbalimbali vya Marekani.

“Ushirikiano pia umeonekana kwa ushirika wa wahitimu wa Chuo Kikuu cha SUA (Sugeco) kwa kuwezesha kupeleka zaidi ya wahitimu 200 nchini Marekani na kuwaunganisha na programu za kilimo biashara,” amesema Profesa Nyange.