Othman: Jiandikisheni kwenye daftari la mpigakura tulete mabadiliko Zanzibar

Unguja. Wakati awamu ya pili ya uandikishaji wa daftari la mpigakura ikitarajia kuanza Februari Mosi, Mwenyekiti wa Chama cha ACT Wazalendo taifa, Othman Masoud amewataka wananchi wote kuitumia vyema awamu hii ya mwisho ya uandikishaji ili wapate fursa ya kupiga kura na kukichagua chama hicho kushika dola.

Awamu, hiyo ya pili itaanzia Wilaya ya Micheweni na unatarajiwa kumalizika Machi 17, 2025 wilayani Mjini Unguja.

Kwa mujibu wa Tume ya Uchaguzi ya Zanzibar (ZEC), inatarajia kuandikisha wapiga kura 78,922.

Akizungumza kwa nyakati tofauti katika ziara ya chama hicho aliyoianza jana Janauri 28, 2025 katika majimbo ya Tumbe na Mapofu Wingwi Pemba, Othman amesema mabadiliko ni muhimu kupitia sanduku la kura.

Amesema ni lazima wananchi wa Zanzibar kuutambua mwaka huu wa uchaguzi kwamba ni muhimu kwa mabadiliko na ni lazima kuutumia vyema kwa kukiunga mkono ACT ili kuinusuru Zanzibar na kuweza kupata maendeleo.

“Wananchi lazima kufahamu kwamba silaha kubwa ya chama chochote cha siasa kuweza kuleta mabadiliko ni kuwa na viongozi imara na wanachama kushiriki katika uchaguzi kwa kuandikishwa rasmi kuwa wapiga kura na kwachagua viongozi wanaowataka ili kuleta maendeleo, tujitokeze kujiandikisha,” amesema Othman.

Amesema Zanzibar inaweza kupiga hatua iwapo itaweza kumiliki na kuvitumia ipasavyo vyanzo vyake mbalimbali vya uchumi vilivyopo.

Amesema hilo litawezekana kwa kuwapo mabadiliko ya kisiasa nchini asa kwa vile wananchi wote wa Zanzibar wameamka na wapo tayari Unguja na Pemba kuungana katika kupambania kuleta mabadiliko ya nchi na mageuzi ya uongozi wa kisiasa na kuweza kuharakisha maendeleo ya kiuchumi Zanzibar.

Amesema Wazanzibari kuamka na kuungana kukiunga mkono chama hicho ni kuitikia wito wa viongozi ili chama cha ACT kiweze kutimiza dhamira ya kuisaidia Zanzibar kubadili maisha ya watu kwa kupambana na umasikini na kuleta uchumi imara.

“Uchumi imara utakaosaidia kupatikana ajira za heshima na kupata mishahara inayowiana na kazi yao kwa vijana mbalimbali hapa Zanzibar,” amesema.

Kwa upande wake Naibu Katibu Mkuu wa chama hicho Zanzibar, Omar Ali Shehe, amesema kwamba uchaguzi wa mwaka huu ni maalumu katika kuinusuru Zanzibar na kwamba ujumbe huo unapaswa kuwafikia watu wote ili waungane pamoja katika kujali Uzanzibari na mapenzi kwa nchi yao.

Amesema utu na ubinadamu umepotea na kwamba kuinusuru Zanzibar ni kuwapa wananchi uhakika wa kuishi maisha ya wananchi bila wasisiwasi sambamba na kuondokana na umasikini kwa wananchi ambapo hali zao zinaendelea kudorora kwa umasikini siku hadi siku na kwamba uchaguzi ujao ni turufu na fursa ya mwisho kuinusuru zanzibar.

Amesema ACT Wazalendo ni chama chenye sera bayana na kwamba itahakikisha kuzitekeleza katika kuipa Zanzibar mamlaka kamili kupitia viongozi sahihi waliopo katika chama hicho ambao pia wanazijua vyema shida za waznzibari za kijamii na kiuchumi.

Othman yupo kisiwani Pemba kwa ziara maalumu ya chama na masuala mbalimbali ya kijamii katika mikoa yote huko Kisiwani Pemba ikiwa ni pamoja na kuwaelezea Wazanzibari umuhimu wa kujiandikisha katika awamu ya mwisho ya daftari la kudumu kwa matayarisho ya uchaguzi mkuu kwenye uchaguzi wa Oktoba mwaka huu.