Kampuni ya Elon Musk kuzindua mtandao Tanzania

Huduma ya mtandao ya Elon Musk ya Starlink inatarajiwa kupatikana nchini Tanzania katika robo ya kwanza ya 2023, huku wachambuzi wakisema maendeleo hayo mapya yatakuza uchumi wa kidijitali.

Kulingana na gazeti la The Citizen Tanzania, huduma hiyo, ambayo inamilikiwa na Kampuni ya SpaceX, imekuwa ikitoa muunganisho wa intaneti kwa kutumia maelfu ya satelaiti angani ambazo huwasiliana na vipitishio vilivyoteuliwa vya ardhini.

Waliozungumza na The Citizen wanasema kuwa huduma hiyo mpya itachochea tu sekta ya kidijitali iwapo itauzwa kwa bei nafuu na kutoa mtandao wa kasi.

Kwenye tovuti yao rasmi, Starlink ilitangaza mpango wao wa kuleta huduma hizo kati ya mwezi Januari na Machi kulingana na idhini ya udhibiti.

Mkurugenzi Mkuu wa Mamlaka ya Mawasiliano Tanzania (TCRA), Jabiri Bakari alithibitisha kwa The Citizen kuwa Kampuni ya Starlink ilituma maombi.

Alipoulizwa iwapo anafahamu kuhusu kuwasili kwa Starlink Corporation, Dk Bakari alijibu: “Ndiyo, ninafahamu kuwa kampuni hiyo ilituma maombi kupitia tovuti.

Mataifa pekee ya Kiafrika ambayo hadi sasa yameiruhusu Starlink kufanya kazi ni Nigeria na Msumbiji.

Hii ilifanyika baada ya kupata vibali vya udhibiti kutoka kwa mataifa yote mawili.

Ikiwa Starlink itakuwa na athari kubwa au la itategemea jinsi biashara hiyo inatarajia kutoa huduma kwa haraka na kwa bei nafuu, kulingana na mwanauchumi Abel Kinyondo kutoka Chuo Kikuu cha Dar es Salaam.

“Huduma ya mtandao sio anasa bali ni hitaji la msingi. Kasi yake ya juu na uwezo wake wa kumudu inaweza kumaanisha kasi kubwa na upatikanaji wa haraka wa habari,” alisimulia.